Еурофарм Пелистер 2 им се врати на победите во ракометната Суперлига, откако на домашен терен во Битола го совлада Куманово со 36-30. Битолчани имаа контрола врз резултатот во најголемиот дел од првото полувреме. Куманово само во два наврати успеваше да поведе, додека домаќинот во финишот стигна и до највисоките четири гола предност (16-12). Сепак, наместо мирно да го приведат полувремето до крај, избраниците на Бранислав Ангеловски дозволија гостите да возвратат со серија од 3-0, па на паузата се замина со минимални 16-15.
Во второто полувреме Еурофарм Пелистер 2 повторно го презеде ритамот на играта. Ангеловски се одлучи за напад со седум ракометари, тактиката даде резултат, а домашниот состав постепено ја зголемуваше предноста. Куманово немаше одговор во завршницата, па битолчани без поголеми проблеми ја сочуваа предноста и славеа со конечни 36-30.
За Еурофарм Пелистер 2 ова беше втора победа во пет одиграни натпревари, додека Куманово останува при дното на табелата со само еден освоен бод. Кристијан Симоновски со осум гола и Димевски, Лозановски и Гутиќ со по шест беа најефикасни кај победничкиот тим, додека по осум кај Куманово имаа Костов и Радван.
Ракомет
Суперлига 2026/27
Петто коло
Еурофарм Пелистер 2 - Куманово 36-30 (16-16)
Спортска сала „Боро Чурлевски“ - Битола
Гледачи: 500
Судии: Лејла Јашар и Викторија Прентоска
Еурофарм Пелистер 2:
Трајков, Младенов, Димевски 6, Лозановски 6, Стојков 2, Митревски 3, Гутиќ 6, Шулевски, Лазаревски 2, Илиески 2, Георгиев, Ј. Симоновски 1, Крстевски, Дрогришки, Ѓорѓиевски, К. Симоновски 8
Седмерци: 6/5
Исклучувања: 10 минути
Куманово:
Г. Трајковски, Цавејски 1, Мечкароски 1, Димитров 3, Вујицевски, Костов 8, Цветковски, Новаковски, Стојановски 2, М. Трајковски 1, Омар Мамдух 9, Николовски, Гичев 6, Мохамед, Закарија Алу, Младеновиќ, Хамза Мамдух Ибрахим
Седмерци: 3/3
Исклучувања: 8 минути
Во следното шесто коло Еурофарм Пелистер 2 гостува кај Младост во Богданци.
