Проектот и тимот за новата сезона е комплетен - најдобриот македонски ракометар и натаму ќе игра за најдобриот македонски тим!
Филип Кузмановски го продолжи договорот со шампионот на Македонија, Еурофарм Пелистер, за уште една година и ќе го предводи тимот во одбрана на домашната титула и во походот во Лигата на шампионите. Капитенот на македонската репрезентација и капитен на Еурофарм Пелистер стави потпис на нов договор и ќе го продолжи својот победнички пат, кој започна уште од неговото доаѓање во Битола во ноември 2023 година.
29-годишниот Кузмановски е дете на Пелистер, созреваше во Металург, ја почувствува Бундеслигата, носејќи го дресот на Магдебург, Хановер и Вецлар и се врати уште покомплетен во својата Битола. Точно една деценија е незаменлив дел од македонската репрезентација, за која играше на пет Европски и пет Светски првенства, а беше дел и од еден завршен турнир на олимписки квалификации.
Филип Кузмановски следната недела ќе се јави на прозивката за почетокот на сезоната 2025/26.
