Ракометарите на Еурофарм Пелистер одиграа одличен натпревар, но претрпеја пораз во Лигата на шампионите, откако вечерва загубија од повеќекратниот европски првак Барселона со 30-34 (13-17).
Битолчани беа равноправен противник против фаворитот во поголемиот дел од првиот дел, а резултатот беше нерешен девет пати до 9-9. Во тој период македонскиот првак во четири наврати имаше водство од еден гол. По 9-9 Барселона направи серија од 6-1 за водство од 10-15, што само ја навести победата на шпанскиот тим.
Во второто полувреме Барселона во неколку наврати имаше предност од +7, а во финишот битолчани намалија на 30-33, но гостинот го задржа водството.
Најефикасни на дуелот беа Дејан Манасков и Ник Хенигман од Еурофарм Пелистер со по осум голови, а кај победничката екипа Дика Мем и Домен Макуц постигнаа по шест. Голманот на Еурофарм Пелистер, Никола Митревски дуелот го заврши со тринаесет одбрани.
Ракомет
Лига на шампиони 2025/26
Б група - петто коло
Еурофарм Пелистер - Барселона 30-34 (13-17)
Спортска сала „Боро Чурлевски“ - Битола
Гледачи: 3.500
Судии: Курсад Ердоган и Ибрахим Оздениз (Турција)
Еурофарм Пелистер:
Митревски, Мацанковски, Манасков 8, Хенигман 8, Пешевски 4, Цехте 2, Видомски 2, Хекберт 2, Кузмановски 2, Тајник 1, Хосни 1, Калес Валид, Абутовиќ, Петар Атанасијевиќ, Хаџиќ, Павле Атанасијевиќ
Седмерци: 3/3
Исклучувања: 4 минути
Барселона:
Нилсен, Халгримсон, Мем 6, Макуц 6, Гомез Абељо 5, Нгесан 4, Баруфет 4, Фабрегас 3, Фраде 3, П. Цикуша 2, Базан 1, Фернандез Хименез, Ѓ. Цикуша, Јанц, Сола Бастера, Грау Ибањез
Седмерци: 2/1
Исклучувања: 2 минути
Во следното шесто коло следниот четврток Еурофарм Пелистер гостува кај Магдебург.
